ఏడాదికి రూ.2 కోట్ల సంపాదన... అయినా ఆమెకు పెళ్లి కావడంలేదు!

సింగపూర్‌లో లీగల్ కౌన్సిల్‌గా పనిచేస్తూ ఏడాదికి రూ. 2 కోట్లు సంపాదిస్తున్న ఓ 39 ఏళ్ల భారతీయ మహిళ.. తనకు కాబోయే భర్త విషయంలో పెట్టిన కఠినమైన షరతులు ఇప్పుడు సోషల్ మీడియాలో హాట్ టాపిక్‌గా మారాయి. 27 ఏళ్ల వయసు నుంచే ఆమె తల్లిదండ్రులు సంబంధాలు చూడటం మొదలుపెట్టినా, 12 ఏళ్లు గడిచినా ఆమెకు ఇంకా పెళ్లి కాలేదు. దీనికి ఆమె షరతులే కారణమంటూ ఓ మ్యారేజ్ బ్యూరో నిర్వాహకురాలు పంచుకున్న వీడియో, పోస్టులు నెట్టింట వైరల్ అయ్యాయి.

ఆమె పెట్టిన షరతులు ఇవే:
ఆమె చెప్పిన వివరాల ప్రకారం, తనకు కాబోయే భర్తకు కొన్ని కచ్చితమైన అర్హతలు ఉండాలని స్పష్టం చేసింది.
వయసు: 42 ఏళ్లు మించకూడదు.
ఆదాయం: తనతో సమానంగా లేదా అంతకంటే ఎక్కువగా (ఏడాదికి రూ. 2 కోట్లు) ఉండాలి.
వైవాహిక స్థితి: ఇంతకుముందు పెళ్లి అయి ఉండకూడదు. విడాకులు తీసుకున్న వారిని చేసుకుంటే నలుగురూ ఏమనుకుంటారోనని ఆమె తిరస్కరించినట్లు తెలిసింది.
ప్రాంతం: నార్త్ ఇండియన్ అయి ఉండాలి.
నివాసం: ఇప్పటికే సింగపూర్‌లో స్థిరపడి ఉండాలి.
అందం: చూడటానికి 10కి 7 మార్కులు వేసేలా ఉండాలి.

ఈ కఠినమైన నిబంధనల వల్లే ఆమెకు సరైన జోడీ దొరకడం లేదని మ్యారేజ్ బ్యూరో నిర్వాహకురాలు అభిప్రాయపడ్డారు. ఈ కథనం సోషల్ మీడియాలో వైరల్ అవ్వడంతో నెటిజన్ల నుంచి భిన్నాభిప్రాయాలు వ్యక్తమవుతున్నాయి. కొందరు తనకు నచ్చిన వాడిని ఎంచుకునే హక్కు ఆమెకు ఉందని సమర్థిస్తుంటే, మరికొందరు ఇంత కఠినంగా ఉంటే పెళ్లి కావడం కష్టమేనని వ్యాఖ్యానిస్తున్నారు.